Nagpapatuloy ang pamamahagi ng relief goods ng Municipal Social Welfare and Development Office (MSWDO) sa mga pamilyang naapektuhan ng pananalasa ng Bagyong Odette kamakailan.
Sa kasalukuyan ay nasa 2,601 relief goods na ang naihatid at naipamahagi sa mga barangay upang makatulong sa pangangailangan sa pagkain ng bawat pamilya.
Ang mga food packs na ipinamamahagi ng lokal na pamahalaan ay naglalaman ng limang kilong bigas, siyam na canned goods, walong pirasong noodles, 10 pirasong energy drink, at 10 piraso ng 3n1 coffee.
Samantala, bumuhos naman ang donasyon mula sa ilang sangay ng gobyerno tulad ng Department of Social Welfare and Development, Pamahalaang Panlalawigan ng Palawan, Office of the Civil Defense, Provincial Disaster Risk Reduction and Management Office, at Tourism Infrastructure Enterprise Zone Authority.
Ilang pribadong kompanya rin ang nagpaabot ng tulong sa pamamagitan ng assorted goods, bigas, at tubig na kinabibilangan ng Lazuli Resort, SANVIMEMCO, Coca Cola, at GMA Foundation.
Kamakailan ay bumisita rin si Vice President Leni Robredo kung saan personal niyang inihatid ang 100 sako ng bigas para sa mga nasalanta ng bagyo.
